2012-02-3/3


EX SINIS

2012-02-21: Celebratio anni novi Buddhistici Tibetani in Re publica Populari Sinarum exstincta est, quia ob statum Tibeti se ab mense Martio anni prioris jam duodeviginti homines incenderant.

EX EUROPA SEPTENTRIOORIENTALI ET ASIA MEDIA

2012-02-22: Conjuratio terroristica gregum privatorum contra locos Judaicos in Azerbajdzhano detecta est. Ministerium salutis gentilis Cohortem Rerum Novarum Iraniae et Hezbollah Libani suspectas habet.

EX AMERICA LATINA ET OCEANIA

2012-02-24: Incarcerati conflixerant in custodia prope Montem Regis in Nova Legione Mexici septentrionalis. Gubernator civitatis ministrum salutis publicae generalem Jacobum Castañeda magistratu depulit.

EX CIVITATIBUS FOEDERATIS AMERICAE

2012-02-26: Praemia Academiae in Ruscisilva data sunt. Pellicula Francica muta "Artifex" optima facta est. Pellicularum non Anglice locutarum pellicula Iranica "Separatio" optima aestimata est.

EX EUROPA OCCIDENTALI ET CANADA

2012-02-26: Germania et Francia operarios civiles suos ex institutis regiminis Afghani demiserunt. Civitates Foederatae Americae et Britanniae jam idem fecerunt, cum centurio et tribunus occisi erant.

EX ASIA ORIENTALI

2012-02-27: Post calamitatem in electrificina nucleari Fukushima regimen Japoniae de Tokio evacuando cogitaverat. Ita dixerunt litterae Fundationis Motus Japoniae Reaedificandae.

EX ASIA AUSTROOCCIDENTALI

2012-02-28: Commissaria Consociationis Nationum juribus humanis Navanethem Pillay ad indutias in Syria vocavit. Aditum adjutorii humanitarii quoque postulavit. Jam septem milia quingenti homines mortui putantur.

NUNTIUS AD MUNDUM UNIVERSUM SPECTANTS

2012-02-28: Inventae sunt duae novae species praehistoricae Spheniscidarum - Kairuku grebneffi et Kairuku waitaki. Kairuku grebneffi sesquimetrum alta fuit, itaque maxima Spheniscida umquam cognita.

EX EUROPA MERIDIONALI ET AFRICA

2012-02-29: Aegyptus interdictum itinerandi septem Americanis imperatum abrogavit. Ii pro societatibus democratiam faventibus ex Civitatibus Foederatis Americae sustentis laborabant.



SONITUS

http://www.box.com/s/xtcfobntbh2aznl5dgjt

ACCENTUS

Hispanicus

MUSICA POSTERIOR

Janan sawa (carmen Assyricum)