19 DE OCTOBRE 2008, DIE DE SOLE

Laophoro it ex via et conflige arbore in territorio de Krasnodarsk in Russia. Auriga et duo vectores es caeso.

20 DE OCTOBRE 2008, DIE DE LUNA

Praeside de Russia Dmitrij Medvedev adveni ad Armenia in modo publico. Themate principale de conloquio cum praeside de Armenia Serž Sargsjan es problemates internationale currente et eventos in Caucaso.

21 DE OCTOBRE 2008, DIE DE MARTE

Secundo generale de Civitates Foederato de America John Craddock, duce maximo alto de Consociatione ex Pacto de Atlantico Septentrionale in Europa, consensu de bello in Afgania inter socios de Consociatione decresce. Secundo Craddock, multo incolas de Afgania crede, que Ṭālibān propone gubernaculo magis capace quam rectione currente de pupulos.

Quidem 21 captivos es occiso ad causa de seditiones in custodia in Mexico iuxta confinio inter Mexico et Civitates Foederato de America, in loco non longo de urbe McAllen in Texia. Seditione de captivos es oppresso ab aediles et milites cum mente brutale in modo apparente.

22 DE OCTOBRE 2008, DIE DE MERCURIO

Donatores occidentale promitte 4,5 milliardo dollarios pro reficere Georgia, que e succumbe damno illato dum bello breve contra Russia in Ossetia Meridionale in Augusto. Secundo aliquo russos, hoc pecunia es pro praeside de Georgia Micheil Saakašvili quam clarigatione pro suo bello contra Russia et amminiculo de terroristas in Caucaso, qui assulta Ingussetia et Daghestania in tempore recente, et aliquo centum-milliones i es uso pro fisco personale de Saakašvili.

Dies de Russia eveni in septem civitates de America Latino. Praesentatione de Russia incipe in Cuba et id i percurre Ora Opulento, Venetiola, Brasilia, Argentina, Chilia et Paraquaria.

Russia, Irania et Quataria - tres civitates facente 60% de gasio - vol creare societate de civitates exportante gasio simile ad Societate de Civitates Exportante Petroleo.

23 DE OCTOBRE 2008, DIE DE IOVE

Congressu Europaeo-Asiatico de 43 civitates incipe cras in Peitśink. Themate principale es congerie oeconomico currente. Alan Greenspan, rectore prisco de argenaria centrale de Civitates Foederato de America Systemate Aerario Foederale, nomina problemates oeconomico currente quam "megacymate de creditos".

Pavore in bursas revoca se itero in ce mane in Tōkjō, ubi indice de Nikkei decresce 5,52% pro pavore de deminutione in mundo toto. Indice de bursa in Corea Meridionale decresce circa 8%. Pavore in bursas i revoca se itero in Europa et America in modo apparente.

Aeroplanos de Civitates Foederato de America sine gubernatore assulta schola religioso per tormentos iuxta confinio de Afgania, in provincia de Pakistania Waziristan Septentrionale, et illos occide quidem octo discipulos.

Impetu per bomba in autocineto in Zagreb, capite de Croatia, occide Ivo Pukanić, domino de ephemeride pro hebdomade Nacional.

24 DE OCTOBRE 2008, DIE DE VENERE

Nave cosmico de Russia Sojuz TMA-12 divide se de Statione Cosmico Internationale et incipe suo itinere ad Tellure. Tres cosmonautas - Sergej Volkov, Oleg Kononenko et sexto turista cosmico Richard Garriott - es in nave. Nave veni ad terra post aliquo horas in modo felice et molle in Casachia.

Buzz Aldrin, secundo homine qui penetra superficie de Luna, dic in tempore recente, que primo astronautas, qui i attinge superficie de Marte, non pote expecta, que illos i reveni ad Tellure; illos i debe vive reliquo de suo vita in Marte.

Indice Nikkei in Iaponia decresce 7% in ce mane. Indice Kospi de bursa in Corea Meridionale decresce 7,5% heri et 9% in ce mane. Indice Dow de bursa in New York decresce 2%.

25 DE OCTOBRE 2008, DIE DE SATURNO

Post duo dies de congressu Europaeo-Asiatico de 43 civitates, que eveni in Peitśink, duces de civitates Europaeo et Asiatico pete vice de systemate argentario internationale. Illos etiam consenti, que Aerario Monetario Internationale i da auxilio ad civitates assultato ab crise argentario. Congressu de viginti civitates cum oeconomias maximo grande eveni in mense proximo in Washington.


12 DE OCTOBRE 2008, DIE DE SOLE

Circa tres mille Christianos effuge urbe in Iraquia septentrionale al-Mōṣul ad causa de terrore de extermistas Sunnitico dum hebdomade recente.

Congressu extraordinario de civitates de Zona de eurone i eveni hodie in Paris ut aestimare crise oeconomico. Etiam ministro primo de Regno Unito Gordon Brown participa isto congressu. 15 civitates de Unione Europaeo iam habe eurone in usu et in 1 de Ianuario 2009, eurone fi nummo publico etiam in Slovachia. Etiam sex alio civitates praeter civitates de Unione Europaeo habe eurone in usu quam suo nummo publico.

Ministro de res argentario de Russia Alexej Kudrin nuntia ante congressu de ministros de res argentario de Grege de Viginti Civitates evento heri in Washington, que participatores i aestimare auxilio addititio ad civitates, que es iuxta ruinas.

13 DE OCTOBRE 2008, DIE DE LUNA

Unione Europaeo depone interdicto de peregrinatione ad praeside de Ruthenia Albo Aliaxandr Lukaszenka et alio viros publico principale in modo temporale dum sex menses ut nutrire vices democratico in civitate supradicto.

Argentaria centrale de Civitates Foederato de America, sive Systemate Aerario Foederale, approba emptione de societate argentario conturbatore Wachovia per pretio de quinque centum milliardo dollarios ab argentaria Wells Fargo.

Pretios in bursas internationale incipe crescere in hoc mane. Pro exemplo indice Hang Seng de bursa in Śiānggǎng e cresce plus quam 10%. Indice de Frankfurt etiam cresce aliquanto, sed id es nondum claro, an bursas de Civitates Foederato de America i succedere exemplo de Asia et Europa.

Ministro primo de Iraquia Nūrī Kāmil al-Mālikī declara, que Iraquia non plus ege milites de Regno Unito et que Regno Unito iam pote removere suo toto exercitu ex Iraquia.

Post congressu hesterno de civitates de Zona de eurone in Paris, que nuntia auxilio argentario novo, bursas de Asia cresce in isto mane. Duces de Zone de eurone heri consenti pignerare mutuos inter argentarias et nuntia, que illos i approba conturbatore de nullo societate argentario ponderoso. Etsi vario auxilios ab Zona de eurone et ab Civitates Foederato de America, praeside de Argentaria Mundano Robert Zoellick praedice, que crise argentario continge civitates vile in modo maximo, nam illos non habe satis pecunia ut auxiliare suo societates argentario.

14 DE OCTOBRE 2008, DIE DE MARTE

Confoederatione de Phylarchias Arabico agnosce Agro Merulense quam civitate independente et libero.

Nave cosmico de Russia Sojuz TMA-13, que vola ex portu cosmico de Russia Bajkonur in Casachia in die de sole, hodie expone apud Statione Cosmico Internationale in modo felice. Tres astronautas es in nave: uno de Russia, uno de Civitates Foederato de America et uno turista solvente, Richard Garriott, qui solve circa triginta millione dollarios pro suo decem dies in Statione Cosmico Internationale. Suo patre Owen Garriott vive dum duo menses in statione cosmico primogenio de Civitates Foederato de America Skylab in anno 1973.

Gubernaculo de George Bush nuntia, que id eme partes de argentarias vario de Civitates Foederato de America per pretio de 250 milliardo dollarios ut deterrere ruinas oeconomico.

15 DE OCTBORE 2008, DIE DE MERCURIO

Senatore de Nebrasca Ernie Chambers accusa Deo. Secundo accusatione, Deo fac et mane fac comminationes terroristico de calamitate grave ad personas innumerabile per flumines, terraemotus, furacanos, turbines terrente, clades pestifero, fames saevo, aritudines devastante, bellos et genocidios, mendas natale, id es catastrophas calamitoso cum multo mortes, destructione et terrore contra milliones de homines, includente infantes innocente, impuberes, minores, senes et infirmos, sine clementia aut discrimine. Iudice excute accusatione, nam domicilio de reo non es scito et iudicio non pote notere illo de accusatione.

16 DE OCTOBRE 2008, DIE DE IOVE

Paene sex mille infantes de Re Publico Populare de Sina mane in valetudinario ad causa de problemates de renes ab lacte et cibo continente melamino.

17 DE OCTOBRE 2008, DIE DE VENERE
Societate nationale pro petroleo de Cuba Cubapetroleo nuntia, que Cuba pote habere circa viginti milliardo cupas de petroleo in campos subaqueano apud suo littores. Si isto aestimationes es correcto, Cuba pote habere paene tanto petroleo quanto Civitates Foederato de America et paene bis multo quam Mexico.

18 DE OCTOBRE 2008, DIE DE SATURNO

Russia nuntia, que duo milites es occiso et septem es vulnerato per insidia ab separatistas Islamico in Ingussetia. Secundo alio nuntios, magis quam quadraginta milites de Russia es occiso. Secundo aliquo russos, isto terroristas es de Georgia et suo actos es approbato ab praeside Micheil Saakašvili.

Decem-milles de increpatores it in Baġdād contra proposito de gubernaculo de George Bush manere in Iraquia in tempore magis longo. Nunc Iraquia es prenso ab 144 mille milites de Civitates Foederato de America et 8 mille alio milites.


5 DE OCTOBRE 2008, DIE DE SOLE

Praeside de Russia Dmitrij Medvedev manda ministerio de defensione, agentes exercente iure et ministerio de res peregrino cognoscere bombardatione in capite de Ossetia Meridionale Tschinval in 3 de Octobre 2008. Autocineto portante armos e es detento ab custodes de pace de Russia et deportato ad Tschinval, ubi id e explode. Unione Europaeo et Organisatione pro Securitate et Cooperatione in Europa damna isto acto de terrorismo in tempore plus prisco. Magistratos de Georgia dic, que officios speciale de Russia es post hoc explosione, que e occide septem custodes de pace de Russia.

Magistrato de ministerio de res interno de Georgia dic, que exercitu de Russia relinque suo robores in zonas de securitate in confinio inter Ossetia Meridionale et Georgia.

In 2 de Octobre, conatu occidere Anatolij Margijev, capite de administratione de Ossetia Meridionale in Achalgori, falle. Illo supervive explosione de bomba posito in via in viculo in Georgia, quando illo ire ad Tschinval in Ossetia Meridionale.

6 DE OCTOBRE 2008, DIE DE LUNA

Ad causa de crise oeconomico in Civitates Foederato de America et Unione Europaeo, faeneratores in Iaponia vende dollarios et eurones in modo cito. Pretio de eurone es 140 ienas, et de dollarrio 103 ienas, nunc in bursas in Iaponia.

Civitates Foederato de America confide Russia pro volatos de homines ad cosmo inter annos 2010 et 2015.

Negotio es suspenso in bursas principale in Russia, post quando actiones merge 20%, dum pretios de petroleo cade et es timores de oeconomia globale.

7 DE OCTOBRE 2008, DIE DE MARTE

Praeside de Russia Dmitrij Medvedev nuntia 950 milliardos de rubelos addititio de mutuo tumultuario novo pro argentarias in convento in Kremlina.

Russia assenti sufficere mutuo tumultuario de quatuor milliardo de eurones ad Islandia.

Lusitania agnosce Agro Merulense.

8 DE OCTOBRE 2008, DIE DE MERCURIO

Congressu internationale eveni in Évian in Francia; urbe supradicto es apud littore de Lacu Lemano. Conloquio personale bilaterale inter praesides de Russia et Francia, Dmitrij Medvedev et Nicolas Sarkozy i eveni hodie. Themate principale es proelio in Ossetia Meridionale.

Heri indice de Dow in New York cade ab quinque centum punctos et id es maximo infero in quinque annos. Bursa de Śiānggǎng et alio bursas dura cadere in ce mane. Indice Nikkei in Iaponia cade ab 9% incredibile.

Bursas de Russia RTS et MICEX resiste negotio ad die de Venere, post quando illos es adaperto dum solo dimidio de hora, nam pretios cade idem quam in omne bursas de mundo et idem quam pretios de petroleo.

Praeside de Ucraina Viktor Juščenko dimitte parlamento et edicte electione festino.

9 DE OCTOBRE 2008, DIE DE IOVE

Post quando praeside de Russia Dmitrij Medvedev participa congressu internationale in Évian in Francia, suo aeroplano adveni ad capite de Chirgisia Biškek in mane hodierno. Medvedev i loqui cum praeside de Chirgisia Kurmanbek Bakijev.

Monte Nigro et Re publico Macedonico agnosce Agro Merulense, ampliante numero toto de membros de Consociatione de Nationes agnoscente Agro Merulense ad quinquaginta.

10 DE OCTOBRE 2008, DIE DE VENERE

Praemio Nobeliano de pace es donato ad praeside antecedente de Finnia Martti Ahtisaari, qui e media resolutione de proelios internationale. Quam legato speciale de Consociatione de Nationes, illo duce Namibia ad independentia in anno 1990, illo e es arbitro in ignistitio inter gubernaculo de Indonesia et rebelles in Aceh, et illo e media pacto de pace in Agro Merulense.

Secundo membros de Factione Democratico in Civitates Foederato de America, George Bush debe advoca congressu de Grege de Octo Civitates ad causa de crise oeconomico globale.

Praeside de Venetiola Hugo Chávez nuntia, que illo expecta adventu de praeside de Russia Dmitrij Medvedev ad Caracas in ce Novembre.

Campione de Russia in nartare trans fundo Alexej Prokurorov mori, post quando illo transinte via in Vladimir es ferito ab autocineto.

Uno ex societates de assecuratione maximo grande in Iaponia Iamato Seimei Hoken Kabuśiki-gaiśa es conturbatore.

11 DE OCTOBRE 2008, DIE DE SATURNO

Spectatores de Unione Europaeo in Georgia nuntia, que Russia comple fatale covento de detractione.

Terraemotu pertinge Russia meridionale. Suo epicentro es in Tsetsenia.