2014-04

ASKOLTEZ SONA ENREJISTRURO
  • 2014-04-17 | 2 456 765 | 150 151 UA-14 | Rusia ed Ukrainia kun Usa e l' Uniono Europana kun-venis por negocii urjanta en Genève, sud-west-Suisia. Omni quar konkordis, ke "formacuri milital kontre-lega en Ukrainia" esas dis-solvenda e ke omnu okupanta konstrukturi esas desarmizenda e livigenda; omna manifesteri kontre-guverneria esis amnestiota segun la konkordo. Skarmucho en la bazo milital Ukrainiana en Mariupol, est-Ukrainia, da militanti por-Rusiana rezultigis la morti di tri del militanti, la vundi di altra deketri e la kapto di altra sisadeketri. L' unajo dil armeo Ukrainiana, vehili kurasizita di qua raptesis da trupi por-Rusiana, dispersesis e sua membri akuzesis pri krimini. Prezidantulo Rusiana Vladimir Putin konfesis sendir trupi Rusiana a Krimea ye un monato antee por protektar equipuro Rusiana milital ibe. Judi en Doneck, est-Ukrainia, imperiesis per folieti faligita da ne-konocato enrejistrar su che la guvernerio dil Republiko Populal di Doneck proklaminta su ipsa. La komuneso Juda en Doneck refuzis to kom provoko.
  • 2014-04-18 | 2 456 766 | 142 035 VN-13 | Sep homi ocidesis dum konflikto frontieral inter migranti Chinlandana kontre-lega e trupi sekuresal Vietnamana en provinco Quảng Ninh, nord-Vietnam. Ye nur kelka hori plu tarde, trupi sekuresal Vietnamana haltigis duadekeun migranti kontre-lega en Móng Cái, probanta ek-irar Chinlando tra maro.
  • 2014-04-29 | 2 456 777 | 142 030 KR-46 | Cinematografuro surveyal montris la kapitano di paromo Sewol foriranta la navo e lasanta sua pasajanti. La paromo Sewol sinkis ye la dekesisesma di aprilo; plu kam duacent homi mortis e preske cent des-aparis. La prezidantino Sud-Koreana Park Geun-hye exkuzis su en televiziono nacional pri mala traktado dil evento dal guvernerio.