2012-04-1/3

DE AMERICA LATIN E OCEANIA

2012-04-01: Un stato de urgentia ha essite declarate in Fiji. Quasi 7000 homines ha essite displaciate e duo homines ha essite occise durante inundationes. Le situation esseva expectate pejorar se, con tempestas forte post le depression tropic 17F.

DE EUROPA DEL SUD E AFRICA

2012-04-04: Un terrorista-suicida ha facte un bomba exploder in le theatre national de Somalia in Mogadiscio durante un ceremonia, occidente al minus dece homines, includente le presidentes del Committee Olympic de Somalia e le Federation de Somalia de Football.

DE EUROPA DEL NORD-EST E ASIA CENTRAL

2012-04-02: Al 30me anniversario de le Guerra de Falkland inter le Regno Unite e Argentina, Argentina menaciava per un action contra bancas del Statos Unite e del Regno Unite. Le prime ministro del Regno Unite David Cameron ha appellate le invasion per Argentina in le anno 1982 un torto profunde.

2012-04-09: Accusationes ha essite retracte contra Larisa Litvinova in le causa del viro de lege Serguei Magnitski, le morte controverse de qui in un prision in Russia habeva ducte a assertiones de tortura e negligentia. Le medica Larisa Litvinova habeva essite responsabile de un tractamento de Serguei Magnitski in le hora de su morte.

DE STATOS UNITE DE AMERICA

2012-04-03: Votantes in le statos Maryland (SUA del sud) e Wisconsin (SUA del nord) e in le capital Washington ha participate un election primari republican. Mitt Romney ha ganiate in omne tres concursos. Le presidente del Statos Unite Barack Obama ha officialmente obtente le nomination per le Partito Democratic, ganiante in le election primari democratic in Maryland, Wisconsin e le capital Washington.

2012-04-08: Le policia ha arrestate duo blancos suspecte de exequer un attacco per tirar contra nigres in Tulsa, Oklahoma, SUA del sud, que habeva evente ante un die, lassante tres homines morte e duo lese. Le tiros son investigate como un crimine de odio. Inter habitantes de Tulsa, circa quatro sextes son blanc e un sexte es nigre.

DE CHINA

2012-04-05: Un compania chinese assecurante naves ha annunciate, que illo cessara indemnisar naves-cisternas portante petroleo de Iran. Isto representa un serramento continue de sanctiones del mundo contra Iran.

2012-04-10: Le Partito Communista de China ha excluse su ex-functionario senior Bo Xilai ex le Bureau Politic, durante que su uxor Gu Kailai ha essite nominate como un suspecta del homicidio de un viro de affaires del Regno Unite.

DE ASIA DEL SUD-WEST

2012-04-08: Al minus 40 homines ha essite occise in le tote Syria ante le data ultime pro fortias armate de Syria a retraher se ex citates, como un parte de un plano de pace mediate per le emissario special de le Nationes Unite e le Liga Arabe Kofi Annan. In su message paschal annual del Vaticano, le papa Benedicto XVI ha appellate particularmente pro un fin de le effusion de sanguine in Syria.

2012-04-08: Salvatores recercava superviventes possibile de le avalanche, que habeva affecte un base de le armea de Pakistan, interrante circa 135 homines, apud le glaciero de Siachen disputate inter India e Pakistan.

DE EUROPA DEL WEST E CANADA

2012-04-09: Le ministro de le sanitate de Germania Daniel Bahr ha dicte al jornal Die Welt, que le declaration per le governamento israelita de Günter Grass como un persona non grata es exaggerate. Illo esseva un reaction a su poema "Que Debe Esser Dicte", condemnante le programma nucleari de Israel, un annihilation possibile del iranianos per Israel e un livration de submarinos de Germania a Israel; le poema ha ergo essite classificate como un libello antisemitic odiose. Su autor Günter Grass es un recipiente del Premio Nobel de Litteratura del anno 1999. Interim, un sculptura celebrante le libertate de expression in Gottinga, Basse Saxonia, Germania del nord, ha essite revestite per un graffiti rubie dicente a Günter Grass, que ille claude su ore.

DE ASIA DEL EST

2012-04-10: Functionarios spatial de Corea del Nord ha avisate, que omne preparationes pro le lancha ha essite complete. Plure lineas aeree in Asia ha provisorimente alterate routes de su volos pro evitar le rocchetta de Corea del Nord plus tarde in iste septimana.

---

SONO

http://www.box.com/s/eb9cb4a107b7a26c6bcb

ACCENTO

francese, portuguese, italian, anglese, espaniol (2×), italian, espaniol, italian, espaniol, francese, espaniol

MUSICA DE FUNDO

Suite nº 1 in D minor, op. 15 de Arthur Foote (SUA)