- EX ASIA ORIENTALE
- 2012-02-01: Japonia veta importatione de pecore volatile ex toto Australia ad causa de influentia aviario. Indonesia, Hongkongo, Singapora et Vietnamia veta id ex Victoria, Australia austroorientale.
- EX EUROPA MERIDIONALE ET AFRICA
- 2012-02-03: Fautores de pediludio conflige in Portu Said, Aegypto septentrionale. Quasi octoginta homines mori. Regimine militare es suspecto de excitare isto conflictiones, ut retinere potestate in suo manus.
- EX EUROPA SEPTENTRIOORIENTALE ET ASIA MEDIO
- 2012-02-05: Plus quam duo cento homines mori ad causa de frigore in Ucraina, Polonia et alibi in Europa. Rossia debe minuere praebitiones de gaso naturale. Multo volatus es revocato in aëroportu Heathrow in London nivoso, ubi area appulsorio es clauso. Bosnia et Hercegovina edice statu de vigilantia.
- EX ASIA AUSTROOCCIDENTALE
- 2012-02-04: Re publico Populare de Sina et Rossia veta proposito de Foedere Arabico condemnante regimine de Syria. Illos assere, que etiam adversarios es noxio. Tunisia remove suo agnitione de regimine de Syria. Parlamento Arabico vol, que civitates Arabico abrumpe rationes cum Syria. In dies recente, magis quam centum homines es mortuo ad causa de violentia in Hims, Syria medio. Manifestationes contra legationes de regimine de Syria eveni in Germania, Britannias, Australia, Aegypto, Graecia et Kuwaito. Decem-duo participes de manifestatione es deprehenso in London.
- 2012-02-07: Praeside de Maldivas Mohamed Nasheed abdica se, everso ab vigiles, qui e perfuge ad adversarios.
- EX CIVITATES FOEDERATO DE AMERICA
- 2012-02-07: Rick Santorum lucra in comitios primario praesidiale republicano in Minnesota, Colorato et Missuria.
- EX AMERICA LATINO ET OCEANIA
- 2012-02-07: Praeside de Argentina Cristina Fernández de Kirchner conquere de Britannias ad causa de Falklandia. Querella es allato ad Concilio de Salute et Conventu Commune de Consociatione de Nationes. Id es de militarizatione indicto de regione de Insulas Falklandico, quem Argentina vindica.
- EX EUROPA OCCIDENTALE ET CANADA
- 2012-02-07: Ministro de res interiore de Francia Claude Guéant es insimulato de inclinatione ad doctrina nazistico. Illo e dice: "Adverso relativismo de sinistros, pro nos non omne civilizationes es aequale. Illos, qui defende humanitate, es viso quam magis exculto pro nos quam illos, qui nega id. Illos, qui defende libertate, aequalitate et fraternitate es pro nos magis supero quam illos, qui approba tyrannide, subjugatione de feminas et odio de alio societates vel gentes." Praeside de Francia Nicolas Sarkozy adjuva opiniones de suo ministro quam sensu commune.
- EX SINA
- 2012-02-09: Ministro primo de Canada Stephen Harper vise Re publico Populare de Sina. Illo et praeside Hu Jintao, ministro primo Wen Jiabao et ministro secundo Li Keqiang subscribe contractus commerciale.
- SONITU
- http://www.box.com/s/frqsvqi6b9ioh4vylp0y
- ACCENTU
- Hispanico
- MUSICA POSTERIORE
- carmine Assyrico
