2015-10 — su(p)plement

AUDI REGISTRATION DE SON (accentu sved)

(orthographie historic)

  • 1123512852015-10-06 | In Stockholm, li cité capital de Svedia, li hoannual premie Nobel de physica ha esset donat a japaneso Takaaki Kajita e canadeso Arthur B. McDonald pro lor decovrition de oscillation de neutrinos.
  • 2015-10-07 | Li premie Nobel de chimie ha esset donat a svedo britannic Tomas Lindahl, statuniteso Paul L. Modrich e turko statunitesi Aziz Sancar pro lor labor pri reparation de acide deoxyribonucleic.
  • 2015-10-19 | Li companie technologic statunitesi Apple ha retraet centes de a(p)plicationes móbil por li systema operativ iOS ex su mercería App Store, pro un decovrition de programmarium secretmen inviant informationes personal de utilisatores a un firma de reclame in China.
  • 2015-10-19 | Hay clima de tensiones escalat ínter israelites e palestineses. Omri Levy, un soldato israelian de etá decinin annus, esset mortat e círcum deci homes vulnerat per un a(t)tacca tirativ e picativ in li station central de ómnibus in Be'er Sheva, un cité calid in sud-Israel. It hat esset fat de Mohind al-Okbi, un árabo beduin e cive israelian de etá duantun annus; il esset mortat pos un fusilada. Durant li a(t)tacca, Haptom Zarhum, un immigranto erythrean, esset fusilat pro un erra de un guardie de securitá israelian e il esset a(g)gresset de spectantes, queles pensat, que il es anc un ex li a(g)gressores; poy il morit in un hospitale pro su vúlneres. Policie e(f)fortiat identificar e reperar membres del turbe, queles hat battet e fatalmen vulnerat li mann. Li o(f)ficiere de securitá, li tira de quel íncapabilisat li víctimo, ne va esser investigat.
  • 2015-10-20 | Reserchatores del Universitá de California in Los Ángeles (States Unit de América) ha decovrit un indicie, que vive sur Terra fórsan comenciat ye 4.1 billiones de annus ante nu — ye tricent milliones de annus plu antey quam originalmen pensat.