2013-07-06 | 2 456 480 | 150 154 LT | Lituania celebras sua Dio di Stateso. Ye 760 yari antee, Mindaugas kronizesis kom rejo di Lituania mez-epoka, quan moderna Lituania konsideras kom sua precedanto. Inter-tempe, Lituania prezidas la Konsilantaro di la Uniono Europana ed ol facas esforci por finar sua dependeso de gaso Rusiana, ankragonte navo gasuya nomata "Ne-dependeso" an insuleto Kiaulės Nugara.
2013-07-07 | 2 456 481 | 002 014 TZ | Prezidantulo Usana Barack Obama vizitis Tanzania. Dum konfero jurnalal kun olua prezidantulo Jakaya Kikwete, Obama anuncis serchar nova modelo di relati kun Afrika, konsistanta ne nur sokurso e helpo ma anke komerco e partenereso.
2013-07-10 | 2 456 484 | 419 029 BS | Bahama celebras sua dio di ne-dependeso. Ye 40 yari antee, ol divenis stato suverena, ma ol ne cesis esar loyala ad Elua Majesto Elizabeth 2ma, per la Graco de Deo Rejino di la Komuneso di Bahama e di Sua altra Rejii e Teritorii, Kapo di la Komuneso. Inter-tempe, Bahama ed Usa signatis memorando di kompreno kontre kriminado piratal.
2013-07-18 | 2 456 492 | 150 154 FI | Ministrino di yusteso Finlandana, Suedino Anna-Maja Henriksson, dicis, ke Finlando ne grantos stando di linguo ofical, nun posedata dal Sueda, anke al Rusa, malgre ke pro en-migrado Rusa-parolanti esos same nombroza quale Sueda-parolanti en Finlando en la yaro 2050. Sam-tempe, Rusia minacas a Finlando per kontre-moyeni, se ca lando olim neutra en-iros NATO.
2013-07-19 | 2 456 493 | 150 039 VA | Papo Franciskus institucis nova komisitaro pontifikal por plu granda responsiveso e translucideso fiskal.
2013-07-22 | 2 456 496 | 142 145 AE-DU | L' Emirati Araba Unionita pardonis Norvegino Marte Deborah Dalelv, qua pos violacesir en Dubai kondamnesabis a 16 monati di en-karcerigeso pro relato sexual exter-mariaja.
2013-07-24 | 2 456 498 | 150 154 DK-85 | Arkeologi des-kovris kolonio Vikinga kun juveli metaloza olda 1 300 yari en farmeyo proxim Kirke Hyllinge, est-Dania.
2013-07-26 | 2 456 500 | 002 015 EG | On manifestis amasale en la tota *Egipto ye tri semani pos ke demokratiale elektita Islamista prezidantulo Muhammad Mursi militale forigesabis. Adminime ok homi mortis e centi vundesis dum violentado.
2013-07-26 | 2 456 500 | 021 840 US-OH | Ariel Castro, qua kidnapis tri muleri de Cleveland, Ohio, nord-Usa, kondamnesis ad en-karcerigeso perpetua.
2013-07-28 | 2 456 502 | 142 | India ofris presto di cent milion dolari a Vietnam, uzota por komprar quar bateli di patrolio milital.
2013-07-28 | 2 456 502 | 150 151 PL-MA | Papo Franciskus anuncis, ke la Dii Mondal dil Junaro eventos en la yaro 2016 en Kraków, sud-Polonia.
